Herregenser: Er det muleg?!

Det tok si tid, men like over nyttår vart også herreversjonen av denne genseren ferdig. Dameversjonen var ferdig i fjor haust. Mønsteret er sterkt inspirert av Karsten Warholm sitt fantastiske OL-løp, der han sette verdsrekord på 400 meter hekk. Tida: 45.94.

Ikkje så enkelt å få fram rette fargane i vinterlyset, men grønt og kvitt er fargane til Dimna IL- som er klubben til Warholm. Genseren har også hekkar, OL-ringane, verdsrekorden, løpebanene, sitatet "Er det muleg?!"- og ein Dimnakorr (sau). 

Genseren er strikka i Rauma finull i fargane 430 og 400 på pinnar nummer 3 og 3,5.  På herreversjonen har eg laga raglanfelling, medan dameversjonen har rundfelling.

Her er damegenseren: 

Islender

Islenderen er tilbake i motebildet for fullt. Denne varianten er strikka i Vams frå Raumagarn på pinnar nummer seks.

Eg tok utgangspunkt i denne oppskrifta frå Rauma- men eg ville unngå å ha isydde ermar. Difor bestemte eg meg for å strikke frå halsen og ned. Eg la opp 74 maskar på pinnar nummer fem, strikka halskanten, skifta til pinnar nummer seks og delte av til framstykke (20 maskar), bakstykke (20 maskar) og to ermar (15 maskar kvar) - med ein raglanmaske mellom kvar del. 

Så auka eg ein maske på kvar side av raglanmaskane på annakvar omgang nedover. Og når overdelen passa mottakaren, delte eg av til ermar og bol.

Bolen er litt cropped- etter ønske frå mottakaren. Og ermane er litt posete, der felte eg berre nokre få maskar nedover- før eg reduserte masketalet til 36 på vrangborda.

Dette var ein rask og effektiv måte å strikke ein islender på. Vams er eit svært godt garn, som berre blir mjukare og mjukare i bruk.

Afmæli

Kan det bli finare?? Denne genseren ligg som gratisoppskrift her, og har det blitt strikka i eit utal fargekombinasjonar. Ifølgje Google Translate betyr det islandske ordet Afmæli bursdag på norsk, og det passar bra- for denne genseren er ei bursdagsgåve. (Mottakar fekk lov til å velje seg ein genser eg skulle strikke.)

Genseren er strikka i str M i dei originale fargane i Lettlopi: Black sheep, Ligth beige heather, Bottle green heater, Violet heater, Stone blue heather, Celery green heater, Golden heater, Rust heater og Brick heater. 

Eg brukte pinnar nummer 3,5 på vrangbordene og 4,5 på resten.

Blå Louisiana Sweater

Denne vart ferdig i sommar. Det er ein Lousiana Sweater frå PetiteKnit, strikka i tre ulike trådar: Kos frå Sandnesgarn (farge 5521), Plum frå Rauma (farge 067) og lyseblå Nøstebarn totråds merinoull.

Meiner eg brukte pinnar nummer seks på vrangbordene og elles pinnar nummer ni. Strikka i str XS/S- men tilpassa til mottakaren etter kvart. Sidan genseren blir strikka frå halsen og ned, er det enkelt å prøve på undervegs for å finne ut kva tid ein skal dele av til ermar og bol.

Lousiana Sweater

PetiteKnit har mange fine oppskrifter. Dette er Lousiana Sweater, som er ein enkel genser strikka ovanfrå og ned. Eg har strikka fleire slike i ulikt garn (er berre ikkje heilt i rute med blogginga...), og fordelen er at det er lett å tilpasse genseren etter kvart som du strikkar.

Denne er strikka i ein tråd Wish frå Drops (nr 05, beige) og ein tråd Pickles pure wool (nr 331). Sistnemnde er ein utgått farge, den finst i alle fall ikkje i nettbutikken til Pickles no.

Eg brukte pinnar nummer 6 på vrangbordene(skulle eigentleg vere nummer 8), og så pinnar nummer 9 på resten. Str XS/S.

- Er det muleg?!

ER DET MULEG?!: 3. august 2021: Det er tidleg morgon når eg slår opp auga på rommet i femte etasje på Cochs Pensjonat i Parkvegen i Oslo. Resten av familien søv. Eg blir liggande å tenke. Stemmer det at eg nokre timar tidlegare hadde stått ikledd nattkjole på golvet her og ropt høgt? Eg sjekkar nettavisene, og fleire stader lyser sitatet “Er det muleg?!” imot meg. Ifølgje rapportane frå Tokyo var det det Karsten Warholm ropte då han var komen i mål og innsåg at han hadde sett ny verdsrekord på 400 meter hekk med tida 45,94.

Det slår meg at det er på tide å gjennomføre ein idé eg har hatt sidan han tok det første VM-gullet i 2017.

Seinare den dagen går eg difor innom Husfliden på Stortorvet. “Skal jeg hjelpe deg med noe?”, blir eg spurt medan eg står og vurderer dei ulike garntypene. “Neidå, eg skal berre finne Dimna-fargane”, seier eg- og får eit svært spørjande blikk til svar.

No er genseren ferdig. Den er kraftig inspirert av Karsten, Dimna IL og det utrulege OL-gullet. Ser du etter, skal du finne både hekkar, OL-ringane, verdsrekorden, løpebanene, sitatet- og ein Dimnakorr. Genseren er strikka i finull frå Raumagarn, og er i storleik L. Dette er dameversjonen, planen er å strikka også ein herreversjon.

Gul Puttygenser

Påska varte visst heilt til juni år.. Dette er ein Puttygenser frå Sandnesgarn, strikka i garnet Kos. Eg starta på den i påska, men fekk ikkje fullført den før no nyleg.

Eg strikka str L på pinnar nummer 5 og 5,5. Oppskrifta finst i eit julehefte frå Sandnesgarn. Mjuk og herleg genser, som eigentleg er veldig kjapp å strikke.

RETRO: Fanagenser

Eg har sikkert sagt det før, men eg likar å ta vare på strikkaplagg. Denne genseren er nok rundt tretti år gamal.

Mønsteret er Fana og fargane er grønt og kvitt. Eg er ikkje heilt 100 prosent sikker, men eg trur genseren er strikka i garnet Heilo frå Dale. Og sikkert i storleik M. Genseren er litt vid og kort og har vide ermar. Det er visst litt moderne no, ifølgje tolvåringen. 

Nydeleg vårlys på stranda!

Haukeligenser

Det er kjekt med slike små prosjekt som blir raskt ferdig. Dette er Haukeligenser frå Klompelompe-boka "Strikk til store og små anledninger." Genseren er i str eitt år, og er strikka i alpakka frå Sandnes. Pinnar nummer 3 og 3,5.

Genseren er strikka frå halsen og ned, det vil seie at du gjer frå deg alt det gøye (mønsterstrikk) med ein gong. Oppskrifta er godt forklart og legg å følgje.

No skal genseren sendast til ein liten mottakar i London.

Eg brukte icord-felling på bol og ermar, det hindrar vrangborda å rulle seg opp.

Oskargenser til Olivia

Dette er ein Oskargenser. Oppskrift frå Bystrikk/Knitting Inna. Eg har strikka den av Royal Alpakka frå Dale i str cirka eitt år.