Sommartopp

Tida går fort og det er snart sommar igjen. Kom på at eg ikkje har fortalt om denne sommartoppen tidlegare, så betre seint enn aldri...

Toppen er strikka i merino frå Viking Garn og eg brukte pinnar 3,5 på vrangborde nede og elles pinnar 4,5.

Bilda vart tekne i fjor sommar, og viser ein sjølvdesigna topp. Jentene la inn bestilling på ein litt kort topp med stroppar, og eg la opp litt på måfå og ordna passforma undervegs. Resultatet vart ikkje så verst- og eg har også strikka ein rosa og ein lyseblå versjon. I skrivande stund er eg i gang med heile tre stk, som er bestilt av venninner til eldstejenta.

Hjørundfjordgenser

Fin, sant? Dette er Hjørundfjordgenseren i haustfargar. Genseren frå Hjørundfjordstrikk vart lansert i Bakketunet på Bjørke i Hjørundfjorden i Ørsta 13. september. Då kjøpte eg to garnpakkar, ein til tolvåringen og ein til meg. No er den første ferdig, strikka i str S.

Genseren er strikka av Rauma finull på pinnar nummer tre og 3,5. Strikkepakkane finst også i ein vårversjon (grøn), ein sommarversjon (rosa/lilla) og vinterversjon (blå). 

Oppskrifta var lett å følgje, og sjølv om det nesten ikkje er omgangar utan mønster, følte eg ikkje at det blei for komplisert.

Svartulvgenser

Boka Villmarksgensere har vorte ein stor suksess, og eg har tidlegare strikka Føyka og Norsk skoggenser derifrå. Denne her heiter Svartulvgenser, og eg har strikka den i Blåne frå Hillesvåg.

Blåne er eit pelsullgarn, og det gjer plagga litt lodne og ekstremt varme og omtrent vindtette. Denne genseren vil nok eigne seg som eit ytterplagg i den kaldaste vintertida.

Fin fargekombinasjon, synest eg. Mønsteret gjer at genseren blir dobbel.

Genseren er strikka i str L, og er det er ikkje eigaren som står modell her.

Mariusgenser

Søtare enn dette er vel knapt mogleg å bli for ein genser. Storleiken er rundt 1 år, og eg har brukt Lanett babyull. Genseren er strikka på pinnar nummer tre.

Prøvde å leike meg litt med dei ulike fargane, litt usikker på om det fungerer. Hadde kanskje vore ok å strikke heile mønsteret i kvitt og heller spare den lysaste rosa til halsen?  Vel det svaret får eg ikkje, for no er genseren ferdig.

Nøstepleddx3

Veldig mange kjenner klassikaren Mor Signes babyteppe, strikka av ull frå Nøstebarn. For ei stund sidan lanserte dei ein større variant: Nøstepledd. Medan babyteppet er strikka med éin tråd, er Nøstepleddet strikka med heile fire trådar.

Oppskrifta, som du finn gratis her, seier at ein skal bruke anten dobbel tråd Vestlandsull, eller to trådar merinoull og to trådar silkeull. Eg har gjennom åra opparbeidd meg eit stort lager av totråds merinoull frå nettopp Nøstebarn, og såg difor her ein sjanse til å bruke ein del av det. 

Teppa er strikka på pinnar nummer ti frå hjørne til hjørne, og til kvart teppe har eg altså brukt 800 gram totråds merinoull. Teppa blir rundt 1,70x1,70m, og er rett og slett heilt fantastisk mjuke og varme.  

Det gjekk overraskande raskt å strikke, faktisk. 

Vanskeleg å gje eit rett inntrykk av kor store teppa her, men dette bildet viser vel litt:

Weatherman

Eg er veldig glad i rein ull, og både norsk og islandsk garn står høgt på favorittlista. Denne genseren er av islandsk design og heiter Veurfringurinn/Weatherman.

Genseren er strikka i Lettlopi. Botnfargen heiter Chocolate heather nr 0867. I tillegg er det heile seks mønsterfargar: Murkey (nr 1420), Oatmeal Heather (nr 0085), Ash Heather (nr 0056), Light Beige Heather (nr 0086), Light Ash Heather (nr 0054) og White (nr 0051). Eg kjøpte garnpakke her, men eg bytta ut Black Sheep- som eigentleg skulle vere hovudfargen,

Eg strikka den største storleiken (XL), så den er i største laget til elleveåringen- det er altså ikkje ho som skal bruke genseren. Vrangbordene er strikka på pinnar nummer 3,5, resten på pinnar nummer 4,5. 

Det gjekk med akkurat ni nøster av botnfargen. Og berre litt av dei andre fargane.

Alle gode ting er tre (mariusgenserar på tjukke pinnar)

Det er rart med det: det er artig med prosjekt som gir raskt resultat. Frå før har eg strikka to mariusgenserar på tjukke pinnar. No strikka eg ein til meg sjølv.

Eg strikka denne av Skappelgarnet Myk og Nøstebarn sin tretråds merinoull(det grøne). Mønsteret er strikka i grå Kos og grå alpakka frå Sandnesgarn. Pinnar nummer 8 og 9, storleik M/L.

Elleveåringen fekk ein blå genser for ikkje så lenge sidan.

Episode 2: Mariusgenser med ny vri

Okei, eg lovde at det skulle kome ein episode 2 om mariusgenseren med ny vri (dobbelt garn og tjukke pinnar). Her finn du Episode 1. Altså: elleveåringen fall fullstendig for den første genseren, den som tanta skulle få. Og sidan eg hadde masse garn igjen, hadde eg ikkje noko argument for å sleppe å strikke ein genser til.

Også denne er strikka i ein tråd Pus frå Du store alpakka og ein tråd alpakka frå Sandnes Garn. Eg følgde oppskrifta til str S. Pinnar: 8 og 9.

Mottakaren vart strålande fornøgd i alle fall!

Episode 1: Mariusgenser med ny vri

Eg har ikkje tal på kor marius-plagg eg har strikka, det er eit mønster eg aldri blir lei av. Så då det nyleg kom endå ein ny variant, på tjukke pinnar, frå Sandnes Garn, måtte det sjølvsagt testast.

Genseren skal eigentleg strikkast i éin tråd Børstet Alpakka og éin tråd Kos. I garnlageret mitt finst ikkje desse garntypane, så då brukte eg heller Pus frå Du store alpakka og Alpakka frå Sandnes Garn. Fargenummeret på Pus-garnet var 4004, medan alpakkagarnet var farge nummer 6081 (djup blå).

Eg strikka etter den minste storleiken (S), som skulle få ei overvidde på 108 cm. Vrangbordene er strikka på pinnar 8, resten på pinnar nummer 9. Med så tjukke pinnar går det raskt unna!

Eg strikka både ermar og bol litt lengre enn det oppskrifta sa, og det vart veldig ok. Elleveåringen melde seg frivillig til å stå modell då genseren skulle fotograferast før den skulle sendast til mottakaren. 

Ho fall fullstendig for genseren, og difor kjem det snart ein episode 2- der ein ganske lik genser er involvert....