Mariusgenser i alpakka

Eg nyttar kvart høve til å gje strikkaplagg i gåve:-) Denne Mariusgenseren var konfirmasjonsgåve no i september.

 

Genseren er i str S, og er strikka av alpakka frå Sandnes. 

Dei to døtrene mine, den eine i Mariusgenser, den andre i Loppisgenser frå Pickles.

Alle gode ting er tre (mariusgenserar på tjukke pinnar)

Det er rart med det: det er artig med prosjekt som gir raskt resultat. Frå før har eg strikka to mariusgenserar på tjukke pinnar. No strikka eg ein til meg sjølv.

Eg strikka denne av Skappelgarnet Myk og Nøstebarn sin tretråds merinoull(det grøne). Mønsteret er strikka i grå Kos og grå alpakka frå Sandnesgarn. Pinnar nummer 8 og 9, storleik M/L.

Elleveåringen fekk ein blå genser for ikkje så lenge sidan.

Episode 2: Mariusgenser med ny vri

Okei, eg lovde at det skulle kome ein episode 2 om mariusgenseren med ny vri (dobbelt garn og tjukke pinnar). Her finn du Episode 1. Altså: elleveåringen fall fullstendig for den første genseren, den som tanta skulle få. Og sidan eg hadde masse garn igjen, hadde eg ikkje noko argument for å sleppe å strikke ein genser til.

Også denne er strikka i ein tråd Pus frå Du store alpakka og ein tråd alpakka frå Sandnes Garn. Eg følgde oppskrifta til str S. Pinnar: 8 og 9.

Mottakaren vart strålande fornøgd i alle fall!

Episode 1: Mariusgenser med ny vri

Eg har ikkje tal på kor marius-plagg eg har strikka, det er eit mønster eg aldri blir lei av. Så då det nyleg kom endå ein ny variant, på tjukke pinnar, frå Sandnes Garn, måtte det sjølvsagt testast.

Genseren skal eigentleg strikkast i éin tråd Børstet Alpakka og éin tråd Kos. I garnlageret mitt finst ikkje desse garntypane, så då brukte eg heller Pus frå Du store alpakka og Alpakka frå Sandnes Garn. Fargenummeret på Pus-garnet var 4004, medan alpakkagarnet var farge nummer 6081 (djup blå).

Eg strikka etter den minste storleiken (S), som skulle få ei overvidde på 108 cm. Vrangbordene er strikka på pinnar 8, resten på pinnar nummer 9. Med så tjukke pinnar går det raskt unna!

Eg strikka både ermar og bol litt lengre enn det oppskrifta sa, og det vart veldig ok. Elleveåringen melde seg frivillig til å stå modell då genseren skulle fotograferast før den skulle sendast til mottakaren. 

Ho fall fullstendig for genseren, og difor kjem det snart ein episode 2- der ein ganske lik genser er involvert....

På Marius-køyret igjen....

Det har nesten vorte ein tradisjon: i tida før jul lagar eg tova Mariusvottar. Eg finn stadig nye personar eg kan "prakke" på eit slikt vottepar, he he. I år blei det tolv par vottar og seks par Mariustøfler. Tøflene rakk eg ikkje ta bilde av før dei vart pakka inn.  Votteoppskrifta finn du her. Og oppskrifta på tøflene ligg her.

Alt er strikka i Fritidsgarn frå Sandnes på pinnar nummer seks. 

Mariusgenser i lun ull

Yngstejenta har vakse ut av nesten alle strikkagenserane sine. Då måtte det gjerast noko. Resultatet vart ein mariusgenser, strikka i Lun ull frå Sandnes. (Trur garnet er på veg ut av sortimentet til Sandnes, eg kjøpte det på sal før jul i den lokale garnbutikken.)

Ho ville ha berre to fargar (eg ville ha rosa som tredje farge, men vart nedstemt..) Genseren er strikka på pinnar nummar fem (4,5 til vrangbordene). Eg hadde ikkje oppskrift, men trur genseren er ein XS/S.

Mariusvottarx9

Det har absolutt sine fordelar å vere leiar i ei lita bedrift: då kan eg strikke julegåver til alle dei tilsette:-). Ni par Mariusvottar vart akkurat ferdige i tide.

Alle vottane er strikka i Fritidsgarn frå Sandnes. Alle har ulike fargekombinasjonar.  Fire par herrevottar, fem par damevottar.

Eg tova vottane i vaskemaskin: 40 grader kortvask (30 minutt).

2xMarius

Jaudå, eg strikkar framleis, sjølv om det er litt langt mellom oppdateringane her på bloggen. No er to bestillingsverk ferdige: mariusgenserar i alpakkagarn frå Sandnes.

Den minste er i str 8 år. 

Denne er i str 12 eller XS.

Eg synest ho som bestlte genserane har valt veldig fine fargar!

Mariusvottar

Etter veldig mange tova mariusvottar i Fritidsgarn frå Sandnes, har eg no strikka eit par i Vams frå Rauma.  Eller; det grøne er Fritidsgarn, resten er Vams.

Og dette vart ei positiv oppleving!  Vottane vart veldig fint tova (kortprogram, 40 grader) og er herleg mjuke.

Nok ein liten marius

Hakk i plata? Fantasiløyse? Kjedeleg? Tja, kanskje. Eg har strikka mange mariusplagg, men eg blir aldri lei av mønsteret.  Etter å ha strikka ein liten mariusgenser i romjula, hadde eg framleis garn igjen.  Difor har eg altså strikka endå ein mariusgenser, str. 1 år.

(Ikkje lett å ta bilde i sterk vind..) Genseren er strikka i Smart frå Sandnes. Pinnar nr 3 og 3,5.

Herleg blåfarge!

SÅ fint ver er det her på Sunnmøre i dag. Ti plussgrader, sol og skyfri himmel. Bildet er teke mot Ørstafjorden/Ørsta.