Norgesgenser

Av og til tek eit strikkeprosjekt mykje tid.  Denne genseren er resultat av ei julegåve eg fekk for to år sidan, i 2014. I pakken låg det garn, oppskrift på den såkalla Norgesgenseren og ein lapp med teksta "God jul kjære svigerinne. Julegåva til deg håper eg å få i retur ferdig strikka som julegåve neste år."

Det var altså ein av svogerane mine som ville ha strikkagenser.  Genseren skal eigentleg strikkast i Falk eller Heilo frå Dalegarn, men han hadde valt alpakka frå Sandnes.  Eg måtte prøve meg litt fram for å få rett storleik (XL).  I tillegg laga eg raglanfellingar i staden for isydde ermar- sidan eg ikkje likar å sy/klippe i alpakkastrikk.

Vel, genseren vart ferdig til slutt- eit år seinare enn planlagt.  Vrangbordene er strikka på pinnar nr 3, resten på pinnar nr 3,5.

Hette!

Norgesgenseren er vinnarbidraget i ein konkurranse Norsk Ukeblad arrangerte for tre år sidan.  Mønsteret er inspirert av fjell, sjø og snø.  Meir om genseren og alle oppskrifter finn du her.

Hals

I år vart det ikkje så mange strikka julegåver.  Denne halsen er eit unnatak.

Kjapp og grei, strikka i dobbel i Air frå Drops. Ein rett, ein vrang i ein omgang, rett i neste omgang, osb.

Klassisk mariusgenser

Det verste med desember? Mangel på fotolys!  Denne klassiske mariusgenseren måtte difor fotograferast hengande frå takrenna. 

Genseren er strikka av Smart frå Sandnes i str XL.

Selmagenser

Har du sett årets julekalender på NRK?  Her i huset proklamerte familiens yngste tidleg i desember at ho ønskte seg slik genser som hovudpersonen Selma har.  Gleda var difor stor då ønsket vart oppfylt nokre dagar før jul.

Genseren er strikka i alpakkagarn på pinnar nummer 4. Garnpakke kan kjøpast her.

Lite som minner om kvit jul her på Sunnmøre.  Men Tarzan er kvit, i det minste.

Fine fargar og mjuuuuk genser.

Hundemarius

Då har eg gjort det også: strikka genser til ein hund.  Sidan nabohunden er av den mindre typen, var dette eit raskt og kjekt prosjekt.  Han er faktisk endå mindre enn leikehunden, som måtte prøve den ferdige genseren.

Oppskrifta finn du her.  Eg strikka str XS og brukte superwash ullgarn frå Trysil, kjøpt på Europris.

Tova mariusvottar- igjen

Det finst framleis hender som frys. Dermed vert det stadig nokre tova mariusvottar.  Desse to para er strikka i Fritidsgarn frå Sandnes.

Pinnar nr 6. Tova på 40 grader, kortprogram.

Spennande å sjå korleis dei ulike fargekombinasjonane.

To halsar på eit blunk

Hals på eit blunk frå Pickles viste seg å vere veldig populære. Det vart to grå i ein fei- det tek berre nokre timar å strikke desse.

Halsane er strikka i dobbel Pickles Cozy på pinnar nummer 15.

Mariusvottar

Den observante lesar hugsar nok at eg strikka ein del (kremt) mariusvottar i fjor vinter. Ting kan tyde på at eg kjem til å strikke nokre til...  Desse skal gjevast vekk i gåve.

Dei er strikka av Fritidsgarn frå Sandnes på pinnar nr 6.

(Tarzan blandar seg som vanleg inn når det er tid for fotografering..)

Denne gongen prøvde eg ein kombinasjon av vaskemaskin og tørketrommel då vottane skulle tovast. Gjekk greit!

Hals på eit blunk nr 2

Det er kjekt med småprosjekt innimellom dei litt større og tidkrevjande strikkeprosjekta.  Hals på eit blunk (garn og oppskrift frå pickles.no) er eit slikt raskt prosjekt som det berre tek nokre timar å få ferdig.  I staden for ein rett og ein vrang på alle omgangar, har eg på denne halsen strikka annankvar omgang rett.

Denne er strikka på pinnar nummer femten, garnet heiter Pickles Cozy og fargen heiter Kyanitt.  Garnet inneheld 68 prosent babyalpakka, ti prosent ekstra fin merino og 22 prosent polyamid.  Kjolen åtteåringen har på seg er forresten også frå Pickles. Den strikka eg for fire år sidan til storesystera, og her er blogginnlegget frå den gongen.

Stilig når den nye halsen matchar augefargen!

"Fiskerens genser"

Det er fine fargar i denne Skappelgenseren, synest eg.  "Fiskerens genser" er strikka på pinnar nummer sju med ein tråd Suri og ein tråd minialpakka frå Sandnes.  Meir informasjon her.

Kjappstrikka. Str. M.

Hals på eit blunk

Pinnar nummer 15. Dobbel tråd Pickles Cozy. Nokre timar med strikking. Vips, ein god og varm hals!  Stort enklare kan det vel nesten ikkje gjerast. Halsen er vrangbordstrikka med ein rett og ein vrang. Denne fargen heiter rav.

Garn og mønster får ein kjøpt her.

Regnbogekjole

Alle gode ting er tre. Tidlegare har eg strikka to slike regnbogekjolar, den første kan du sjå her, den andre er her.  Dette tredje eksemplaret er eit bestillingsverk.  Strikka frå halsen og ned på pinnar nummer 3. Det grå garnet er Baby Panda frå Rauma, medan Kauni har æra for dei vakre regnbogefargane.

Heile sju knappar på høgre side. Knappane er mørkegrå. Det gjekk med ca 180 gram Baby Panda og ca eit halvt nøste Kauni, dvs ca 75 gram.

Bestillaren ville ha ein kjole i str sju år.  Trur det skal passe bra, sjølv om den på åtteåringen (ho 140 cm) er meir som ein tunika.