Lousiana Sweater

PetiteKnit har mange fine oppskrifter. Dette er Lousiana Sweater, som er ein enkel genser strikka ovanfrå og ned. Eg har strikka fleire slike i ulikt garn (er berre ikkje heilt i rute med blogginga...), og fordelen er at det er lett å tilpasse genseren etter kvart som du strikkar.

Denne er strikka i ein tråd Wish frå Drops (nr 05, beige) og ein tråd Pickles pure wool (nr 331). Sistnemnde er ein utgått farge, den finst i alle fall ikkje i nettbutikken til Pickles no.

Eg brukte pinnar nummer 6 på vrangbordene(skulle eigentleg vere nummer 8), og så pinnar nummer 9 på resten. Str XS/S.

Grå krigergenser

I løpet av hausten har det også vorte ein grå krigergenser (les om den brune her). 

Denne beheld eg sjølv! Veldig mjuk og varm, og artig å strikke frå halsen og ned. 

Brun krigergenser

For ein herleg genser! Krigergenseren frå Pickles er strikka frå halsen og ned, og har fine fellingar/aukingar i sidene.

Genseren er strikka i Pickles Cozy og storleiken er XS. Vrangbordene er strikka på pinnar nummer 5,5, resten å pinnar nummer åtte.

Kosegenser

Dette er ein Kosegenser. Oppskrifta er henta frå boka "Garnglede i Rosendal", og originalgarnet er Fritidsgarn frå Sandnes. 

Eg gjorde ein vri, sidan eg har ein del garn på lager (kremt): eg strikka med ein tråd Lettlopi og ein tråd Pickles pure wool. Lettlopi-fargen heiter Rust heather (nr 9427). Pickles-garnet heiter Høstløv og har nummer 115. Begge fargane er kjempefine åleine og saman vart dei endå finare! 

Mønsteret er strikka i lys grått Fritidsgarn. Heile genseren er strikka på pinnar nummer seks. Storleiken er M/L. 

Ut mot havet-genser

Eg valde litt andre fargar (for å seie det mildt) enn det Dorthe Skappel har gjort i denne Ut mot havet-genseren. Oppskrifta er gratis og du finn henne her.

Hovudfargen er ein tråd mini alpakka frå Sandnes (farge nr 4554) og ein tråd Suri Alpakka frå Sandnes (farge nr 4545). Det grå er ein tråd mini alpakka og ein tråd Suri. Det grøne og det gule er ein tråd Royal Alpakka frå Sandes og ein tråd Pickles Cozy.

Eg brukte pinnar nummer sju og strikka str M. Det blei ein romsleg og tjukk genser.

Ein fin måte å bli kvitt litt restegarn på!

Lille vinterkonglejakke

Smått og søtt er vel rette skildringa av denne babyjakka.  Oppskrifta er å finne i den nyaste Klompelompeboka og jakka heiter Lille vinterkonglejakke.

Eg har brukt Pickles Pure Wool- eit garn som er utruleg godt å strikke av.  Etter vask vert plagget mjukt og godt.  Fargane er Tranebær nr 106 og Malte mandler nr 158.

Eg strikka str 3 mnd.  Pinnar nr 2,5 på vrangbordene, nr 3 på resten.  Jakka er strikka frå halsen og ned. 

Varm vimpelgenser

Ein gong i fjor kjøpte eg ein garnpakke frå Pickles: varm vimpelgenser.  Først no har eg endeleg strikka genseren, og det gjekk veldig kjapt unna. Pinnar nummer fem (vrangbordene) og seks. Eg strikka str M/L, garnet heiter Pickles Cozy.

Vimplane skal eigentleg strikkast i tre ulike fargar, men eg valde å bruke berre to av dei. Synest det vart veldig fint!

Botnfargen er kremkvit, nr 100 (Quarts), medan vimplane er i fargane kald brun, nr 292 (Porfyr) og oker, nr 3810 (Rav).  Den tredje vimpelfargen var grasgrøn, nr 17-6229 (Smaragd), men den droppa eg altså.  HER kan du sjå alle fargane i Pickles Cozy.

Garnet er ei blanding av babyalpakka, merino og polyamid.  Her på Sunnmøre er det forresten skikkeleg surt ver; ei grad og sluddbyer.

Gudrungenser

Boka #bystrikk ligg på bestseljartoppen og det kan eg godt forstå.  Gudrungenseren må vere eit av dei mest populære strikkemønstra for tida.  Her er min versjon, strikka av Pickles Pure Wool og Nøstebarn-garn.

Hovudfargen er Isbre frå Pickles, ein fantastisk fin blåfarge. Det kvite er ein tråd totråds merino og ein tråd angoragarn frå Nøstebarn.  Det mørkaste blå er dobbel blåbærblå totråds merinoull frå Nøstebarn.

Heile genseren er strikka på pinnar nummer tre. Eg strikka den største storleiken, dvs 10 år, og det passa bra til åtteåringen.

Genseren fekk seg ei runde på silkevask i maskina (30 grader) og vart endå mjukare.

Det gjekk med ca 210 gram Pickles Pure Wool, ca 50 gram av det kvite og ca 40 gram av det mørkeblå.

Eliasvest (Klompelompe)

Så var det dette januarlyset då. Eller helst mangel på lys... Vel, eg har gjort eit forsøk på å dokumentere Eliasvesten eg har strikka. Oppskrift frå Klompelompe. Eg strikka i str 3-4 år og brukte Pickles pure alpaca.

Tre treknappar på kvar skulder, på den eine står det Made with love.

Vesten er strikka i dobbel perlestrikk, noko som gir ein enkel men fin effekt.

To halsar på eit blunk

Hals på eit blunk frå Pickles viste seg å vere veldig populære. Det vart to grå i ein fei- det tek berre nokre timar å strikke desse.

Halsane er strikka i dobbel Pickles Cozy på pinnar nummer 15.

Hals på eit blunk nr 2

Det er kjekt med småprosjekt innimellom dei litt større og tidkrevjande strikkeprosjekta.  Hals på eit blunk (garn og oppskrift frå pickles.no) er eit slikt raskt prosjekt som det berre tek nokre timar å få ferdig.  I staden for ein rett og ein vrang på alle omgangar, har eg på denne halsen strikka annankvar omgang rett.

Denne er strikka på pinnar nummer femten, garnet heiter Pickles Cozy og fargen heiter Kyanitt.  Garnet inneheld 68 prosent babyalpakka, ti prosent ekstra fin merino og 22 prosent polyamid.  Kjolen åtteåringen har på seg er forresten også frå Pickles. Den strikka eg for fire år sidan til storesystera, og her er blogginnlegget frå den gongen.

Stilig når den nye halsen matchar augefargen!