23. april 2017

Varm vimpelgenser

Ein gong i fjor kjøpte eg ein garnpakke frå Pickles: varm vimpelgenser.  Først no har eg endeleg strikka genseren, og det gjekk veldig kjapt unna. Pinnar nummer fem (vrangbordene) og seks. Eg strikka str M/L, garnet heiter Pickles Cozy.
Vimplane skal eigentleg strikkast i tre ulike fargar, men eg valde å bruke berre to av dei. Synest det vart veldig fint!

Botnfargen er kremkvit, nr 100 (Quarts), medan vimplane er i fargane kald brun, nr 292 (Porfyr) og oker, nr 3810 (Rav).  Den tredje vimpelfargen var grasgrøn, nr 17-6229 (Smaragd), men den droppa eg altså.  HER kan du sjå alle fargane i Pickles Cozy.
Garnet er ei blanding av babyalpakka, merino og polyamid.  Her på Sunnmøre er det forresten skikkeleg surt ver; ei grad og sluddbyer.

10. april 2017

"Stor jakke til kalde dagar"

Jepp, jakka heiter "Stor jakke til kalde dagar". Oppskrifta fann eg i boka Strikk med raske pinner av Kristin Wiola Ødegård. 
Oppskrifta er lagt opp til at ein skal bruke Verdi og Fabel Mouline frå Garnstudio, men eg valde heller ein eigen vri: ein tråd Drops Air og ein tråd Dale Royal Alpakka. Sistnemnde frå lageret, frå den gongen Dale produserte garnet sitt her i Noreg.
Eg brukte pinnar nummer sju og strikka etter oppskrifta, som er one size. Jakka vart akkurat passe stor til tretteåringen.

Lommer! Dei er strikka som firkantar og sydde på til slutt

18. mars 2017

Mary møter Leah

Eg skulle i utgangspunktet strikke ein Leah Love-genser... (bilde frå garnius.no):
Men undervegs fann eg ut at eg heller ville strikke det vakre Marymønsteret.  Genseren er strikka i Air frå Drops på pinnar nummer fem. 
Eg strikka str S og dampa genseren forsiktig.
Eg brukte knapt 250 gram lyseblått (farge 16) og ca 30 gram natur (farge 01).
Marymønsteret (snøløv i barnestr) er eit svært enkelt og fint mønster!

16. mars 2017

Lothepus igjen

Denne lua rakk eg berre å knipse nokre raske mobilbilde av, før den forsvann ut døra på veg til mottakaren.
Lothepuslua er strikka i Pure Eco Wool på pinnar nummer fire. Eg la opp 96 maskar. 
Oppskrifta finn du her.
Detaljar....

6. mars 2017

Mariusvottar

Etter veldig mange tova mariusvottar i Fritidsgarn frå Sandnes, har eg no strikka eit par i Vams frå Rauma.  Eller; det grøne er Fritidsgarn, resten er Vams.
Og dette vart ei positiv oppleving!  Vottane vart veldig fint tova (kortprogram, 40 grader) og er herleg mjuke.


1. mars 2017

Grey Eyed-vottar

Eg trur dette er den finaste vottane eg har strikka.  På raverly.com ligg gratisoppskrifta Grey Eyed, og ifølgje designar Rebecca Tsai er ugle- og oliventremønsteret symbol for den greske gudinna Athene.
Vottane har eg strikka på pinnar nummer 2,5 og eg brukte gul og grå Flora frå Drops.  (Gulfargen er berre heilt utruleg klar og fin!) Auga på uglane skal eigentleg broderast med grått garn (forklarer namnet Grey Eyed), men sidan eg bruke grå som mønsterfarge, slapp eg det.
Undersida og tomlane er minst like fine som resten av vottane.
Detaljar.


27. februar 2017

Gudrungenser

Boka #bystrikk ligg på bestseljartoppen og det kan eg godt forstå.  Gudrungenseren må vere eit av dei mest populære strikkemønstra for tida.  Her er min versjon, strikka av Pickles Pure Wool og Nøstebarn-garn.
Hovudfargen er Isbre frå Pickles, ein fantastisk fin blåfarge. Det kvite er ein tråd totråds merino og ein tråd angoragarn frå Nøstebarn.  Det mørkaste blå er dobbel blåbærblå totråds merinoull frå Nøstebarn.
Heile genseren er strikka på pinnar nummer tre. Eg strikka den største storleiken, dvs 10 år, og det passa bra til åtteåringen.
Genseren fekk seg ei runde på silkevask i maskina (30 grader) og vart endå mjukare.
Det gjekk med ca 210 gram Pickles Pure Wool, ca 50 gram av det kvite og ca 40 gram av det mørkeblå.

23. februar 2017

Rosa Lothepuslue

Denne Lothepuslua er strikka i to gråfargar, to rosafargar og ein liten rest lilla.  Eg la opp 88 maskar på pinnar nr 4.  Strikka i originalgarnet Dale Pure Eco Wool.

22. februar 2017

Lue med vrange slangar

Det dukka opp eit behov for ei gåve til ein gut.  Då vart denne lua til, strikka i økologisk ull frå Dale på pinnar nr 4. Eg brukte tre fargar: blått, grått og grønt.
Eg la opp 90 maskar og strikka vrangbord ein rett, ein vrang. Så auka eg ti maskar og strikka sju omgangar rett med blått. Så ein omgang rett og fire omgangar vrangt med grønt.  Byta mellom grønt og grått på desse vrange partia.
Åtteåringen synest dei grå og grøne partia ser ut som slangar.

18. februar 2017

Alle skal få!


Om eg kunne strikke Lothepusluer til alle jentene i tredje klasse...?  Klart eg kunne! Heldigvis er det berre fem jenter i klassa til åtteåringen, og sidan ho allereie hadde fått ei Lothepuslue, var det berre å strikke fire til.   Alle luene er strikka i originalgarnet Dale Pure Eco Wool på pinnar nr 4. Ei lue fekk koksgrå som hovudfarge og lys lilla som kantfarge.
Denne har lys grå som hovudfarge og lys lilla som kantfarge.
Her er det lilla kantfarge og grå som hovudfarge.
Denne har lys rosa kantfarge og sandbeige som hovudfarge.
På alle luene la eg opp 96 maskar. 
Oppskrifta er gratis frå Dale, her hos TV2 finn du den.

10. februar 2017

Lothepuslue

Åtteåringen anar ikkje kven Lothepus er.  Eg veit ikkje så mykje om han eg heller, men har fått med meg at han har mange fine strikkaplagg, til dømes i Kjendis Farmen.  Dette er altså ei Lothepuslue, strikka på pinnar nummer 4 i originalgarnet Dale Pure Eco Wool.
"Mamma, heiter lua LODDEN KATT, eller noko sånt..?", spurde ho, etter at ein lærar hadde kommentert lua.  Tja, to sider av same sak...?
Ekstremt dårlege bilde- seier meg lei for det- dei er tekne under eit gatelys på veg til skøyteisen.  Elles likte eg garnet veldig godt. Nydeleg å strikke av, og med pinnar nummer fire går det raskt unna.  Eg la opp 96 maskar i staden for 120, for at det skulle passe eit barnehovud.

6. februar 2017

Leah Love


Dette var eit festleg prosjekt. Leah Love kjøpte eg som garnpakke frå Garnius. Med Drops Air på pinnar nr 5 gjekk det rykande fort. Det spesielle var at genseren skulle dampast GODT for å få rette storleiken.
Eg strikka str L og dampa den berre sånn middels, for eg ville ikkje ha ein veldig oversized genser. Synest resultatet vart ok.
Sidan eg ikkje kan fordra høge halsar, strikka eg halsen rundt tjue centimeter kortare enn det oppskrifta la opp til.
Raglanfelling.
Dette er eit plagg eg kan ha direkte på huda. Veldig mjuk genser!