Rilledress

Dressen har vore ferdig ei stund, men fekk knappar først i går.. (Merkeleg korleis knappar fort kan vere eit stort tiltak å få sydd i:-))  Eg har strikka dressen frå halsen og ned på pinnar nr 4 i dobbel Drops babymerino.  Og oppskrift?  Tja, eg brukte metoden "Plagget blir til medan eg strikkar."

På berestykket og nedst på ermar og føter er det rillestrikk i fargane blå, turkis og grøn.

Merinoplagg vert veldig mjuke og kløfrie, men sig noko forferdeleg etter vask. Difor må denne tørkast flatt, elles fryktar eg den får lengd som passar ein 10-åring i staden for ein 1-åring!

Litt for store knappar, kanskje..?

Londontunika

Kanskje ikkje så mykje London over dette plagget her, men namnet har ei forklaring: eg var innom Loop Knitting-butikken i Camden Passage då eg var i London for eit par månader sidan. Der kjøpte eg tre hespar a 100 gram av garnet Ultra Alpaca frå Berroco.

Garnet har no vorte til denne tunikaen i str 6-8 år, ca.  Eg starta øvst (la opp 66 maskar) og strikka nedover til garnet var oppbrukt.   Det skulle eigentleg brukast pinnar nr 5, men eg fann berre nr 4,5- så då brukte eg det.

Tunikaen vart rett og slett herleg: mjuk og varm. 

Garnet finst i veldig mange fine fargar.  Ikkje så lett å gjengje fargane eg brukte,  men det er altså lysegrått, lilla og okergult.

(Forresten lenge sidan sist oppdatering her, det skuldast tidenes travlaste haust og lite tid til strikking. Satsar på å kome sterkare tilbake!)

Stjerneruter

Har du fått med deg koftedilla som herjar i landet? Gamle kofter og koftemønster vert leita fram igjen og får nytt liv, spesielt gjennom Facebookgruppa Koftejakten. I løpet av året kjem det ei eiga koftebok, laga av Liv Sandvik Jacobsen og Lene Holme Samsøe.  I den boka er mønsteret på denne Stjernerutekofta med.

Dette er eit gamalt mønster frå Sandnes, opphavleg laga for Triplex-garnet. Eg har brukt Pickles pure wool (det turkise) og dobbelt totrådsgarn frå Nøstebarn (naturkvitt) Nøstebarn og Pickles er mine desiderte favorittar på garnfronten, så dette vart absolutt ein heldig kombinasjon.

Eg brukte pinnar nr 3 på vrangbordene, nr 3,5 på resten. Garnforbruket vart ca 300 g av kvar farge.

Det er ikkje ein einaste einsfarga omgang på heile jakka, så det krev full konsentrasjon når denne skal strikkast:-)

Eg synest kofta vart veldig fin, og eg er fornøgd med at eg klarte å velje litt utradisjonelle fargar.

Nok fotografering for denne gong:-)

Regnbogetunika

Regnboge?, seier du. Dette ser vel ut som ein grå tunika med mørkegrå hjarte...? Jepp, det er det. Men tunikaen har ei lita overrasking på venstre side: åtte hjarte i regnbogefargar.

Tunikaen er strikka i totråds årgangsull frå Nøstebarn. Eg hadde to lysegrå 100 grams hesper med ulik fargenr, og rundt 80 gram mørkegrått. Løysinga var å strikke med dobbel tråd, dvs ein av kvar av dei lysegrå.

Til slutt broderte eg maskesting på nokre av hjarta.

Eg brukte pinnar nr 4, og starta i halsen og strikka nedover. Str ca 7-8 år.

Feriegenser

Denne oppskrifta fann eg her: http://www.pickles.no/feriegenser/

Tiåringen plukka garnet sjølv, då vi var innom Picklesbutikken i Oslo i 34 plussgrader i sommar. Rask strikk! Oppskrifta starta på XS, så eg reduserte litt på masketalet og landa vel på ein XXS-str.

Anorakkbonanza

Osloanorakken frå Pickles vart visst årets sommarstrikk:-) Tre stk til no: ein i str 1år (blå og beige), ein i str 3-4 år (rosa og grå) og ein i str 7-8 år (grøn og beige). Alle er strikka i Nepal frå Drops.

- Den er varm, mamma!!! 

Knappar...

Kjekt med hjelp når det skal takast bilde!

Romper

- Ullbukse midt på sommaren??? Tullar du??? 

Tja, sommarulla frå Pickles har rett nok ull i seg, men berre 30 prosent. Resten er bomull. Difor er det fullt mogleg å bruke denne romperen eller seleshortsen også på denne tida av året.

Eg brukte ganske nøyaktig 100 gram sommarull i fargen blåklokke, brukte pinnar nr 3,5 og strikka i 6 mnd str.

Oppskrifta var enkel å følgje! Mottakaren er eit halvt år gamal, så buksa passar akkurat.